پی آئی اے کا مالی بحران، آج بھی 16 پروازیں منسوخ

کراچی(بیورورپورٹ) پی آئی اے کا مالی بحران شدت اختیار کرگیا جس کے نتیجے میں آج بھی اندرون ملک پروازوں کا فضائی آپریشن متاثر رہاکراچی سے مختلف شہروں کے ہوائی اڈوں پر اترنے والی 16 پروازیں منسوخ ہوگئیں۔کراچی اسلام آباد کی 3 پروازیں پی کے 300، 308 اور 340، اسلام آباد کراچی کی 2 پروازیں پی کے 301 اور 369 منسوخ کر دی گئیں۔لاہور سے کراچی کی 2 پروازیں پی کے 303 اور 307، کراچی لاہور کی 3 پروازیں 302، 304 اور 306 جب کہ کراچی سے گوادر، بہاولپور، فیصل آباد کی دوطرفہ 6 پروازیں منسوخ کردی گئیں۔ سیالکوٹ سے مسقط جانے والی دو طرفہ پروازیں بھی منسوخ کر دی گئی ہیں۔پی آئی اے نے انتہائی ضروری پروازیں آپریٹ کرنے کے لیے پی ایس او کو قبل ازوقت 22 کروڑ روپے کی ادائیگی کی تھی۔ یہ ادائیگیاں پلان B کے تحت محدود آپریشن کے تناظر میں ہفتے اور اتوار کی منافع بخش روٹس کی پروازوں کے لیے کی گئی تھیں۔